Një punëtor 26-vjeçar ka humbur jetën të hënën në Prizren, pas një aksidenti që dyshohet të ketë ndodhur në një kantier ndërtimi gjatë procesit të betonimit.
Sipas informacioneve fillestare, Policia e Kosovës rreth orës 09:00 ka pranuar njoftimin se në ambulancën e lagjes Arbana ishte dërguar pa shenja jete një person.
Menjëherë pas marrjes së informacionit, njësitë policore kanë dalë në Emergjencë dhe në vendin ku dyshohet se ka ndodhur ngjarja.
Bazuar në deklaratat e dëshmitarëve, viktima ishte duke punuar në një objekt në ndërtim kur dyshohet se është goditur nga një pjesë e pajisjes së punës gjatë betonimit. Si pasojë e lëndimeve të marra, ai dyshohet se ka ndërruar jetë në vendin e ngjarjes.
Për rastin janë njoftuar prokurori kujdestar dhe Inspektorati i Punës, ndërsa hetimet për zbardhjen e plotë të rrethanave kanë nisur.
“Në koordinim me institucionet përkatëse, policia është duke ndërmarrë të gjitha veprimet e nevojshme hetimore me qëllim të sqarimit të plotë të rrethanave të rastit”, ka deklaruar Shaqir Bytyqi, zëdhënës i Policisë për rajonin e Prizrenit.
