Eksperti për çështjet e Ballkanit Perëndimor nga Këshilli për Politikat e Demokratizimit (DPC), Bodo Weber, ka vlerësuar se Kosova mund të përballet sërish me zgjedhje të reja, për shkak të krizës së vazhdueshme politike dhe institucionale.
Në një intervistë për gazetën gjermane Frankfurter Rundschau, Weber ka deklaruar se qeveria e drejtuar nga Albin Kurti po ndjek, sipas tij, një qasje që synon vendosjen e institucioneve shtetërore nën kontroll më të madh politik.
“Po shohim një qeveri që ushtron pushtetin në mënyrë relativisht autoritare dhe përpiqet ta vërë shtetin nën kontrollin e saj”, është shprehur ai.
Sipas Weberit, retorika e ashpër politike ka kontribuar në thellimin e ndasive mes forcave politike, duke e bërë më të vështirë tejkalimin e ngërçit institucional.
Ai paralajmëron se skenari më negativ do të ishte vazhdimi i bllokadës politike, gjë që mund ta çojë vendin drejt zgjedhjeve të reja.
“Mund të përballemi sërish me zgjedhje dhe me përsëritjen e të njëjtit cikël politik”, ka thënë Weber.
Duke komentuar raportet mes Kurtit dhe Vjosa Osmani, ai ka vlerësuar se ftohja mes tyre ka ardhur pasi Osmani ka arritur të krijojë pozicion të favorshëm në arenën ndërkombëtare, përfshirë angazhimin e saj në Bordin e Paqes të iniciuar nga Donald Trump.
Sipas Weberit, Osmani mund të ketë synuar forcimin e lidhjeve me Trumpin si pjesë e përpjekjeve për të siguruar një mandat të dytë presidencial.
“Kjo ka krijuar tensione dhe xhelozi brenda qeverisë së Kurtit”, ka vlerësuar ai.
Megjithatë, Weber konsideron se mundësia e një bashkëpunimi politik apo koalicioni mes Osmanit dhe Kurtit pas zgjedhjeve të fundit mbetet shumë e vogël.
