Një ngjarje e rëndë është raportuar paraditen e sotme në rrugën Prishtinë–Prizren, ku një biznes është sulmuar nga persona ende të paidentifikuar.
Sipas informacioneve të para, cak i sulmit ka qenë mobileria “Lina Home”. Dyshohet se autorët fillimisht kanë thyer xhamin frontal të lokalit, e më pas kanë hedhur një mjet ndezës brenda objektit, duke shkaktuar zjarr dhe dëme të konsiderueshme materiale.
Në afërsi të lokalit është gjetur edhe një çekan, i cili dyshohet se është përdorur gjatë sulmit.
Pas raportimit të rastit, në vendin e ngjarjes kanë dalë njësitë policore, hetuesit rajonalë dhe forenzika, të cilët kanë nisur ekzaminimet dhe mbledhjen e provave për identifikimin e të dyshuarve.
Deri më tani nuk raportohet për persona të lënduar, ndërsa dëmet materiale vlerësohet të jenë të mëdha.
Rasti është iniciuar si “Zjarrvënie”, ndërsa hetimet për zbardhjen e motiveve dhe arrestimin e autorëve janë duke vazhduar.
