Aktivisti i ekstremit të djathtë, Tommy Robinson, ka deklaruar se do ta “ndalonte Islamin” nëse ndonjëherë do të bëhej kryeministër.
Duke folur në marshin anti-islam të së shtunës, organizatori – emri i vërtetë i të cilit është Stephen Yaxley-Lennon – tha se ka ardhur koha që “myslimanët të largohen nga ky vend” dhe u zotua se do ta ndalonte Islamin nëse do të vinte në pushtet.
Sipas Policisë, në tubim morën pjesë rreth 60 mijë persona. Protestuesit mbanin flamuj britanikë dhe të Anglisë, ndërsa brohorisnin kundër kryeministrit Keir Starmer dhe shprehnin shqetësime për “humbjen e identitetit britanik”.
Në protestë u panë edhe simbole të krishtera, flamuj izraelitë dhe flamuj të opozitës iraniane. Robinson u bëri thirrje mbështetësve të regjistrohen për votim dhe të përfshihen politikisht para zgjedhjeve të ardhshme.
Ai falënderoi edhe Elon Musk për mbështetjen publike, ndërsa turma brohoriti emrin e tij.
Marshi u mbajt në të njëjtën ditë me një protestë pro-palestineze në Londër, duke bërë që Policia Metropolitane të zhvillojë një nga operacionet më të mëdha të sigurisë publike të viteve të fundit.
Kryeministri Keir Starmer e dënoi tubimin, duke akuzuar organizatorët për përhapje të urrejtjes dhe përçarjes.
