Detaje të rënda janë raportuar për një rast të dhunës në familje që ka ndodhur pas mesnatës në Pejë, ku një 32-vjeçar dyshohet se ka sulmuar fizikisht babanë e tij dhe më pas edhe një zyrtar policor.
Sipas burimeve të afërta me hetimin, i dyshuari është Kastriot Grapci, 32 vjeç, ndaj të cilit më herët kishte ekzistuar edhe një urdhër mbrojtjeje i lëshuar nga gjykata.
Ngjarja dyshohet se ka ndodhur në rrugën “Lekë Dukagjini” në Pejë. Sipas informatave, i dyshuari kishte shkuar në shtëpinë e babait të tij dhe kishte kërkuar para, me pretendimin se i duheshin për të blerë narkotikë.
Pasi viktima nuk kishte pasur para për t’i dhënë, situata dyshohet se ka eskaluar. Fillimisht, 32-vjeçari dyshohet se kishte fikur dritat e shtëpisë dhe më pas kishte nisur ta godiste babanë me shuplaka.
Sipas deklarimit të viktimës, i dyshuari më pas kishte marrë edhe një shkop, me të cilin dyshohet se e kishte goditur disa herë.
Pas ndërhyrjes së Policisë, 32-vjeçari është arrestuar dhe është shoqëruar në Stacionin Policor në Pejë. Por incidenti dyshohet se ka vazhduar edhe brenda ambienteve policore.
Burimet bëjnë të ditur se i dyshuari e kishte grisur aktvendimin për ndalim, ndërsa gjatë transportimit për në Qendrën e Ndalimit në Klinë dyshohet se ka sulmuar një zyrtar policor, duke e goditur me kokë në pjesën e tëmthit.
Ndaj tij janë iniciuar hetime për veprat penale “Dhunë në familje”, “Mospërfillje e gjykatës” dhe “Sulm ndaj personit zyrtar”.
Me vendim të prokurorit, i dyshuari është dërguar në ndalim për 48 orë.
