Gazetari dhe shkrimtari italian Ezio Gavazzeni ka rikthyer në qendër të vëmendjes rastin “Sarajevo Safari”, pasi kallëzimi i tij në Prokurorinë e Milanos nxiti hetime mbi pretendimet se gjatë rrethimit të Sarajevës, shtetas të huaj paguanin për t’u dërguar në pozicionet e forcave serbe të Bosnjës dhe për të qëlluar mbi civilë. Sipas Reuters, Gavazzeni thotë se u shty të merrej me këtë çështje pas dokumentarit “Sarajevo Safari” të regjisorit slloven Miran Zupanič, ndërsa në kallëzim përmenden rrëfime sipas të cilave disa prej të dyshuarve takoheshin fillimisht në Trieste dhe më pas udhëtonin përmes Beogradit drejt kodrave mbi Sarajevë.
Rasti ka marrë edhe më shumë jehonë pasi në media është përmendur emri i presidentit të Serbisë, Aleksandar Vuçiq. Megjithatë, këtu duhet bërë dallimi i domosdoshëm: deri tani bëhet fjalë për pretendime dhe kallëzime, jo për një fajësi të provuar në gjykatë. Raportimet ndërkombëtare thonë se gazetari hulumtues kroat Domagoj Margetić ka dorëzuar një kallëzim penal në Milano, duke pretenduar lidhje të Vuçiqit me këtë çështje, ndërsa vetë Vuçiq i ka mohuar kategorikisht akuzat, duke deklaruar se nuk ka vrarë dhe nuk ka plagosur askënd.
Hetimi italian po shihet si një zhvillim i rëndësishëm, sepse për herë të parë ka kaluar nga niveli i rrëfimeve publike në hapa konkretë proceduralë. Reuters raportoi në shkurt 2026 se një 80-vjeçar italian u identifikua si personi i parë nën hetim në këtë dosje, ku po shqyrtohen dyshime për përfshirje në atë që është quajtur “sniper tourism”. Kjo dosje rikthen në fokus edhe peshën historike të rrethimit të Sarajevës, ku rreth 11 mijë civilë u vranë nga granatimet dhe snajperët nga pozicionet e forcave serbe të Bosnjës, duke e bërë çështjen jo vetëm një histori tronditëse lufte, por edhe një përpjekje të vonuar për drejtësi.
