Mesazhet e siguruara nga platforma e koduar SKY ECC kanë luajtur rol kyç në zbulimin e një rrjeti të gjerë të krimit të organizuar, i dyshuar për trafikim narkotikësh, keqpërdorim dokumentesh identifikimi, armëmbajtje të paligjshme dhe pastrim parash në disa vende të Evropës.
Në një njoftim zyrtar, Europol ka bërë të ditur se hetimi, i cili zgjati rreth tre vjet, kulmoi më 9 qershor me një operacion të gjerë të koordinuar, ku u arrestuan pesë persona të konsideruar si figura kyçe të organizatës kriminale.
Rreth 150 zyrtarë të zbatimit të ligjit morën pjesë në aksion, i cili u mbështet edhe nga ekspertë të Europolit.
Sipas autoriteteve, grupi kriminal përdorte platformën e enkriptuar SKY ECC për të organizuar dhe koordinuar aktivitetet e trafikimit të drogës në disa shtete evropiane, ndërsa baza kryesore e operacioneve të tij ndodhej në Kosovë.
Hetimet kanë zbuluar se nga Kosova udhëhiqeshin aktivitetet kryesore të rrjetit, përfshirë koordinimin e dërgesave ndërkombëtare të narkotikëve, dhënien e udhëzimeve për anëtarët dhe menaxhimin e skemave të pastrimit të parave.
Operacioni i fundit përbën fazën përmbyllëse të një hetimi afatgjatë që kishte në fokus komunikimet e grupeve kriminale përmes platformës SKY ECC.
Gjatë gjithë periudhës së hetimeve janë identifikuar dhe hetuar 42 persona të dyshuar, ndërsa janë realizuar 76 bastisje në lokacione të ndryshme.
Autoritetet kanë sekuestruar asete me vlerë të përgjithshme prej rreth 80 milionë eurosh.
Në operacionin ndërkombëtar kanë bashkëpunuar autoritetet ligjzbatuese nga Belgjika, Franca, Kosova dhe Holanda.
