Parlamenti Evropian ka ngritur shqetësime serioze për gjendjen e luftës kundër korrupsionit në Kosovë, duke vlerësuar se korrupsioni vazhdon të mbetet një problem sistemik që dëmton funksionimin e institucioneve dhe cenon besimin e qytetarëve.
Në raportin e miratuar më 18 qershor, eurodeputetët kanë theksuar se përparimi në këtë fushë ka qenë i pamjaftueshëm, pavarësisht zotimeve të vazhdueshme të institucioneve kosovare. Ata kanë shprehur shqetësim edhe për rënien e Kosovës në Indeksin e Perceptimit të Korrupsionit për vitin 2025, ku vendi renditet i 76-ti nga 182 shtete dhe territore, tre pozita më poshtë krahasuar me vitin paraprak.
Raporti vëren se ky rezultat paraqet një kthim prapa nga trendi i mëparshëm i përmirësimit gradual, ndonëse Kosova vazhdon të jetë më mirë e renditur se disa vende të rajonit.
Parlamenti Evropian u ka bërë thirrje autoriteteve kosovare që të ndërmarrin masa konkrete dhe të menjëhershme për parandalimin, hetimin dhe ndjekjen penale të rasteve të korrupsionit. Në veçanti, kërkohet miratimi i Strategjisë Kombëtare Kundër Korrupsionit dhe planit të veprimit për periudhën 2025–2028, forcimi i mekanizmave të deklarimit të pasurisë, konfiskimit të pasurisë së paligjshme dhe rritja e kapaciteteve të institucioneve përgjegjëse.
Po ashtu, raporti nënvizon nevojën për koordinim më të mirë ndërmjet prokurorisë, policisë dhe njësive të inteligjencës financiare, si dhe përmirësimin e cilësisë së hetimeve në rastet e korrupsionit të nivelit të lartë.
Raporti për Kosovën u miratua nga Parlamenti Evropian me 412 vota pro, 174 kundër dhe 58 abstenime.
