Kryetari i Prishtinës, Përparim Rama, ka reaguar pasi, sipas tij, është përjashtuar nga fjala në një forum kushtuar Lojërave Mesdhetare 2030, duke pretenduar se një gjë e tillë është bërë me “urdhër direkt të Ministrisë së Sportit”.
Rama bëri të ditur se bëhet fjalë për forumin “Road to 2030: Kosovo on the Mediterranean Stage”, të organizuar nga European Investors Council.
Sipas kryetarit të Prishtinës, organizatorëve u është kërkuar drejtpërdrejt nga Ministria e Sportit që ai të mos jetë pjesë e folësve në këtë forum.
Rama e cilësoi këtë veprim si vendim politik dhe jo si një lëshim të natyrës protokollare.
“Kjo nuk është gafë protokollare. Është vendim politik dhe është presion ndaj organizatorëve!”, deklaroi Rama.
Ai drejtoi kritika edhe ndaj Qeverisë së udhëhequr nga Albin Kurti, duke pretenduar se rasti dëshmon ndërhyrje të interesave partiake dhe kontroll politik.
“Të organizosh forum për Prishtina 2030 dhe të kërkosh përjashtimin e Kryetarit të Prishtinës nga fjala është institucionalisht absurd dhe politikisht simptomatik”, shkroi Rama.
Deri në këtë fazë, në informacionin e publikuar nuk është paraqitur një qëndrim i Ministrisë lidhur me pretendimet e Ramës.
