Kryeministri britanik, Keir Starmer, ka njoftuar se qeveria e tij do të ndalojë përdorimin e rrjeteve sociale për personat nën moshën 16-vjeçare, duke e cilësuar këtë si një hap të domosdoshëm për mbrojtjen e fëmijëve.
Duke folur për vendimin, Starmer tha se rrjetet sociale nuk përbëjnë një mjedis të sigurt për fëmijët dhe se në këtë përfundim ka arritur jo vetëm si kryeministër, por edhe si prind.
“Gjithçka që kam dashur ndonjëherë për fëmijët e mi është që ata të jenë të lumtur dhe të sigurt. Besoj se këtë e dëshiron çdo prind”, u shpreh ai.
Starmer pranoi se rrjetet sociale kanë sjellë përfitime për të rinjtë, por theksoi se qeverisja kërkon marrjen e vendimeve të vështira dhe se, sipas tij, një ndalim i plotë është zgjedhja e duhur.
Sipas njoftimit të kryeministrit britanik, personat nën 16 vjeç nuk do të lejohen më të përdorin platformat e rrjeteve sociale, në kuadër të masave të reja për mbrojtjen e fëmijëve në internet.
Detaje të tjera rreth mënyrës së zbatimit të kësaj mase pritet të bëhen publike në ditët në vijim.
