Një operacion i Policisë së Kosovës kundër mashtrimeve të dyshuara përmes qendrave të thirrjeve (Call Center) ka përfunduar me arrestimin e nëntë personave në Prishtinë dhe Obiliq.
Sipas raportimeve, në mesin e të arrestuarve janë edhe Ariana Plakici, ish-banore e Big Brother VIP Albania, dhe Toni Salihu, ish-futbollist i KF Prishtina e Re.
Të dyshuarit dyshohet se vepronin si grup i organizuar, duke kontaktuar shtetas të huaj dhe duke u prezantuar si përfaqësues të kompanive të investimeve financiare, me qëllim përfitimin e kundërligjshëm.
Gjatë operacionit të zhvilluar më 23 tetor, policia bastisi katër lokacione dhe sekuestroi 39 kompjuterë, pajisje elektronike, telefona, një armë dhe mjete monetare.
Prokuroria ka kërkuar caktimin e paraburgimit ndaj nëntë të dyshuarve për veprat penale “Mashtrimi” dhe “Mashtrimi kompjuterik”.
Të arrestuarit konsiderohen të pafajshëm derisa fajësia e tyre të vërtetohet me vendim gjyqësor të formës së prerë.
