Një predikues në Turqi kishte shkaktuar reagime vite më parë pas deklaratave të tij se burrat duhet të mbajnë mjekër, në mënyrë që të dallohen qartë nga gratë.
Kleriku islamik Murat Bayaral, gjatë një paraqitjeje televizive në emisionin “Fatih Medreseleri”, ka kritikuar burrat që nuk mbajnë mjekër, duke thënë se mjekra është një nga tiparet që, sipas tij, i dallon burrat nga gratë.
“Burrat duhet të rrisin mjekër. Një nga dy pjesët e trupit që i ndan burrat nga gratë është mjekra”, ka thënë Bayaral, sipas Hurriyet Daily News.
Ai ka shtuar se nëse një burrë me flokë të gjata shihet nga larg dhe nuk ka mjekër, mund të ngatërrohet me një grua, pasi, sipas tij, sot burrat dhe gratë vishen në mënyrë të ngjashme.
“Zoti na ruajt! Mund të pushtohesh nga mendime të pahijshme”, ka deklaruar ai.
Deklaratat e Bayaral kishin nxitur reagime dhe kritika të shumta. Magdalena Kirchner, eksperte në Istanbul Policy Center, ka thënë për Newsweek se debate të tilla mbi devotshmërinë dhe modestinë në Turqi përsëriten shpesh.
Ajo kishte vlerësuar se qëndrime të tilla reflektojnë përpjekje për të krijuar presion shoqëror ndaj një mënyre më sekulare të jetesës, pa vendosur domosdoshmërisht kufizime ligjore.
