Mungesa e ditarëve shkollorë po vazhdon të krijojë vështirësi në një numër shkollash në Kosovë, përfshirë edhe shkollat e mesme.
Problemi ishte shfaqur që në fillim të vitit shkollor 2026/2027. Mungesa e ditarëve ishte evidentuar në disa komuna të Kosovës, përfshirë Prishtinën, Prizrenin, Gjakovën, Kaçanikun…
Në disa shkolla, mësimdhënësit janë detyruar të përdorin fletë të përkohshme për evidentimin e orëve, mungesave dhe të dhënave të tjera, të cilat më pas duhet të barten në ditarët zyrtarë.
Vonesat në furnizim ishin lidhur me procesin e sigurimit dhe shpërndarjes së dokumentacionit shkollor. Megjithatë, edhe pas fillimit të vitit shkollor, në disa shkolla problemi vazhdon.
Mungesa e një dokumenti bazë si ditari ua shton profesorëve barrën administrative dhe vështirëson zhvillimin normal të procesit mësimor, duke ngritur njëkohësisht pikëpyetje për furnizimin me kohë të shkollave.
