Një motoçiklist ka humbur jetën si pasojë e një aksidenti të rëndë trafiku që ka ndodhur në orët e para të mëngjesit në rrugën “Tirana” në Gjakovë.
Lajmi është konfirmuar nga zyrtarja për informim e Drejtorisë Rajonale të Policisë në Gjakovë, Vlera Krasniqi, e cila bëri të ditur se aksidenti ka ndodhur rreth orës 02:20.
Sipas informacioneve paraprake të Policisë, motoçiklisti dyshohet se nuk e ka përshtatur shpejtësinë me kushtet e rrugës, duke humbur kontrollin mbi motoçikletën. Ai fillimisht është përplasur me trotuarin, ndërsa nga goditja është hedhur mbi një veturë që po lëvizte në korsinë e saj.
Për shkak të lëndimeve të marra, motoçiklisti ka ndërruar jetë në vendin e ngjarjes.
Policia ka nisur hetimet për të zbardhur shkaqet dhe rrethanat e plota të aksidentit.
