Në një reagim publik, Dervishaj ka kërkuar që Byroja për Verifikim dhe Konfiskim të Pasurisë të hetojë jo vetëm përfaqësuesit e opozitës, por edhe zyrtarët e partisë në pushtet.
Sipas pretendimeve të tij, Nagavci ka blerë një shtëpi të re në fund të mandatit qeveritar, ndërsa prona është blerë me kredi dhe me një çmim dukshëm më të ulët se vlera e tregut.
Dervishaj pretendon se kredia e marrë nuk përputhet me të ardhurat mujore të ish-ministres në atë periudhë.
“Së pari, kredia është akorduar me këst që nuk përballohet nga paga që ka ish-ministrja: 1,700 euro pagë, 1,600 euro kredi në muaj”, ka shkruar ai.
Ai ka ngritur dyshime edhe për çmimin e pronës, duke thënë se shtëpitë në atë zonë kushtojnë mbi 250 mijë euro, ndërsa prona në fjalë, sipas tij, është blerë për rreth 150 mijë euro.
Dervishaj ka kërkuar hetim të rastit nga institucionet kompetente.
