Arianit Sllamniku po jep receta mjekësore për “trajtimin e autizmit”, ai ka publikuar në llogarinë e tij se ka pasur kontakt me familje, të cilave i’u dha recetat. Ai shkruan se: “Pastrimi gjeneral i fëmijëve autik edhe sot po vazhdon pa asnjë shqetësim… Rastet: Kosovë, Itali, Belgjikë!”
Kjo është fotografi e ndarë në Facebook nga Arianit Sllamniku.
Lajmi.net ka publikuar një bisedë në formë videoje nga një person i cili ka pasur kontakte dhe ka marrë receta nga Sllamniku, personi që morri recetën thotë se kur ka provuar ti marrë medikamentet, ka rezoltuar se ato medikamente përdoren për kafshët, e jo për njerëzit. Personi shton se trajtimi që i’u është dhënë kishte një vlerë prej 1500 euro, për 3-4 muaj.
Reagimi nga Ministria e Shëndetësisë
Ministria e Shëndetësisë ka ndjekur me shqetësim raportimet në media dhe rrjete sociale lidhur me pretendimet se një individ dyshohet se ka ofruar ilaçe, duke i paraqitur ato si trajtim për autizëm.
Ministria e Shëndetësisë u bën thirrje qytetarëve që t’u besojnë vetëm metodave të verifikuara shkencërisht, të cilat ofrohen nga institucione dhe profesionistë të licencuar shëndetësorë.
Lidhur me këtë rast, Ministria e Shëndetësisë ka njoftuar institucionet kompetente dhe është në koordinim me Policinë e Kosovës për trajtimin e mëtejmë të çështjes, në përputhje me kompetencat ligjore.
Shëndeti i fëmijëve mbetet prioritet absolut dhe çdo keqpërdorim që e rrezikon atë do të trajtohet me seriozitet të lartë institucional.
