Kryeministri në detyrë i Kosovës, Albin Kurti, bëri të ditur në mbledhjen e sotme të qeverisë se ekzekutivi do të ndajë mjete buxhetore për pagat e punonjësve të Radio Televizionit të Kosovës (RTK).
Kurti theksoi se fondet do të sigurohen nga kategoria e kursimeve, duke e cilësuar këtë si një zgjidhje të detyruar për shkak të mosmiratimit të buxhetit për RTK-në në Kuvend.
“Siç ka paralajmëruar edhe ministri Hekuran Murati, kemi shqyrtuar disa opsione për të dalë nga situata. Sot po i ndajmë mjetet e nevojshme nga kursimet. Kjo është një zgjidhje e përkohshme, një improvizim i domosdoshëm pas përpjekjeve tona të vazhdueshme në Kuvend për ta miratuar buxhetin për RTK-në”, u shpreh Kurti.
