Agjencia e Ushqimit dhe Veterinarisë (AUV) ka urdhëruar tërheqjen e menjëhershme nga tregu të produktit “Flips Ketchup”, të prodhuar nga kompania PESTOVA L.L.C., pasi në të janë zbuluar gjurmë të qumështit që nuk figuron në deklaracionin e produktit.
Rasti është raportuar përmes Sistemit Evropian të Alarmimit të Shpejtë për Ushqim dhe Ushqim për Kafshë (RASFF), me numër njoftimi 2026.8267. Gjatë një kontrolli zyrtar në Slloveni është marrë mostër e produktit, ndërsa analizat laboratorike kanë konfirmuar praninë e alergjenit të qumështit.
Sipas vlerësimit të riskut, produkti paraqet rrezik për personat alergjikë ose të ndjeshëm ndaj qumështit.
Pas pranimit të njoftimit, AUV-ja ka nisur gjurmueshmërinë e produktit dhe ka kontrolluar operatorin PESTOVA SHPK. Gjatë kontrollit, është konstatuar se produkti kishte ende sasi në stok.
Tërheqja bëhet për lotin FK 04/26, me datë skadimi 11.02.2027. Nga ky lot janë prodhuar gjithsej 20 mijë e 406 pako, të cilat janë eksportuar në disa vende.
AUV-ja ka ndaluar shitjen dhe shpërndarjen e sasisë së mbetur në depo. Po ashtu, ka vendosur masë kufizuese ndaj prodhimit dhe vendosjes në treg të produktit të ri, deri në përfundimin e analizave laboratorike për praninë e alergjenëve të qumështit dhe korrigjimin e deklaracionit.
Për fatin e produktit, AUV-ja do të vendosë pasi të dalin rezultatet laboratorike dhe të vlerësohet nëse etiketimi është në përputhje me kërkesat ligjore.
