Një aksident i rëndë trafiku ka ndodhur mëngjesin e së enjtes në Shkodër, ku një person ka humbur jetën dhe dy të tjerë kanë mbetur të lënduar.
Sipas njoftimit zyrtar të Policisë së Shkodrës, rreth orës 08:10, në unazën perëndimore të qytetit, automjeti që drejtohej nga shtetasi A.G. është përplasur me automjetin që drejtohej nga shtetasi F.L. Pas përplasjes, njëri prej automjeteve ka goditur edhe një person që po lëvizte me biçikletë.
Si pasojë e aksidentit, çiklisti, rreth 50 vjeç, ka humbur jetën, ndërsa dy drejtuesit e automjeteve kanë pësuar lëndime të lehta.
Në vendin e ngjarjes kanë dalë njësitet policore dhe grupi hetimor, të cilët po punojnë për sqarimin e plotë të rrethanave të aksidentit.
