Mësuesi irlandez Enoch Burke, i cili refuzoi të përdorte emrin dhe përemrin e ri të një nxënësi transgjinor, do të vazhdojë të qëndrojë në burg gjatë periudhës së festave, pasi gjykata ka urdhëruar që ai të mbetet në paraburgim për shkak të shpërfilljes së vendimit gjyqësor.
Burke ndodhet në burgun Mountjoy që nga fundi i nëntorit, pasi shkeli urdhrin e gjykatës që i ndalonte hyrjen në ambientet e Wilson’s Hospital School në Westmeath, ku ai më parë punonte si mësues. Konflikti filloi në vitin 2022, kur drejtoria e shkollës kërkoi që mësuesi t’i drejtohej një nxënësi me emër dhe përemër të ri, kërkesë të cilën Burke e refuzoi duke e konsideruar në kundërshtim me bindjet e tij fetare.
Pavarësisht vendimit të gjykatës për t’i ndaluar futjen në shkollë, ai ka hyrë disa herë në ambientet e saj, duke u shpallur në përbuzje të gjykatës. Gjatë seancës të mbajtur të mërkurën në Gjykatën e Lartë në Dublin, gjykatësi Brian Cregan e paralajmëroi se sjellja e tij e mëtejme jashtë normave të seancës do të sillte rikthimin e menjëhershëm në qeli.
Gjykatësi i ofroi mundësinë që të shmangte qëndrimin e mëtejshëm në burg duke pranuar vendimin dhe duke u zotuar se nuk do të kthehej në pronën e shkollës, mirëpo Burke deklaroi se nuk e pranon se është në shkelje të ligjit.
Burke këmbënguli se qëndrimi i tij bazohet në besimin fetar dhe në kundërshtimin ndaj identiteteve transgjinore, duke thënë se ka “ndërgjegje të pastër” dhe se respekton ligjin. Por gjykatësi e cilësoi këtë argument “nonsense”, duke theksuar se ai ka qenë në shkelje të vendimit gjyqësor për vite me radhë dhe se mungesa e një ankese ndaj vendimit e bën atë të vlefshëm.
Cregan tha se ish-mësuesi ka të drejtë kushtetuese për besimin e tij fetar, por se rasti aktual lidhet ekskluzivisht me moszbatimin e urdhrit për mos-hyrje në shkollë, jo me bindjet e tij. Ai shtoi se Burke nuk do të lirohet as për Krishtlindje, duke theksuar se “si çdo person tjetër në shkelje të kontemptit, nuk ka trajtim të veçantë”.
Burke deklaroi se nuk ka kërkuar asnjë lloj favorizimi, ndërsa gjykata vendosi që shqyrtimi i radhës të bëhet më 3 mars, duke e lënë të hapur mundësinë që ai të lirohet vetëm nëse heq dorë nga shkelja e urdhrit.
Ndërkohë, u tha se ai synon të bëjë apel në Gjykatën e Lartë ndaj një vendimi të mëparshëm, të cilin ai e konsideron kontradiktor dhe të rëndësishëm për procedurat e komisionit disiplinor që po zhvillohen ndaj tij./DailyMail.
