Në Konferencën e 10-të të Mjedrës në Kosovë, kryeministri në detyrë, Albin Kurti, vlerësoi sukseset e sektorit të frutave të imta dhe theksoi se Kosova po shënon përparim të qëndrueshëm në sundimin e ligjit dhe zhvillimin ekonomik. Ai tha se këto rezultate nuk janë të rastësishme, por vijnë si rezultat i reformave të vazhdueshme dhe përfshirjes reale të të gjitha komuniteteve.
Kurti u shpreh se Qeveria që ai drejton nuk dëshiron të jetë spektatore, por partnere e drejtpërdrejtë e fermerëve. Ai njoftoi se sektori i mjedrës dhe frutave të imta ka pësuar rritje të madhe, duke krijuar zinxhir të plotë prodhimi, përpunimi dhe eksporti. Sipas tij, rreth 75 për qind e prodhimit tashmë shkon në tregje të jashtme, duke gjeneruar afërsisht 10 milionë euro.
“Kosova e sotme është histori suksesi që po forcohet nga viti në vit. Stabiliteti, rritja ekonomike solide dhe sundimi i ligjit kanë krijuar kushte që sektori i frutave të imëta të zgjerohet me kontrata afatgjata dhe tregje të reja. Ne duam të jemi partnerë të fermerëve, jo spektatorë”, tha Kurti.
Ai shtoi se rritja e sipërfaqeve të mbjella me mjedra dhe dredhëza është tregues se investimet dhe politikat e qëndrueshme po funksionojnë, duke e shndërruar bujqësinë në një sektor gjithnjë e më të rëndësishëm të ekonomisë së vendit.
Qeveria paralajmëron konferenca të reja në bujqësi
Ushtruesi i detyrës së ministrit të Bujqësisë, Imri Demelezi, tha se Konferenca e Mjedrës është ngjarja e vetme bujqësore që ka arritur të ruajë traditën për 10 vite rresht. Ai njoftoi se nga janari do të nisin konferenca të tjera sektorale, duke synuar që Kosova të bëhet vendi i parë në rajon me një javë të plotë të konferencave bujqësore.
Sipas tij, mbështetja e qeverisë për inovacion dhe zhvillim do të vazhdojë, duke krijuar kushte për rritje të vazhdueshme financiare në sektorin e mjedrave. Ai theksoi se mbi 1 milionë hektarë janë të lidhur me prodhimin e mjedrës, ndërsa interesi i fermerëve për këtë kulturë po rritet çdo vit.
Caritas Switzerland: Dhjetë vite bashkëpunim dhe qëndrueshmëri
Drejtoresha e Caritas Switzerland, Rita Glavitza, theksoi rëndësinë e këtij bashkëpunimi dhjetëvjeçar me fermerët e Kosovës. Ajo e konsideroi konferencën një platformë kyçe për inovacion dhe ngritje të kapaciteteve në bujqësi.
“Dhjetë vjet në bujqësi përfaqësojnë qëndrueshmëri, sfida dhe rritje të përbashkët. Ne besojmë se zhvillimi i qëndrueshëm ndodh kur familjet kanë të ardhura të sigurta dhe të rinjtë shohin të ardhme në vendin e tyre,” u shpreh Glavitza.
Konferenca e 10-të e Mjedrës po cilësohet si një prej ngjarjeve më të rëndësishme të bujqësisë në Kosovë, duke bashkuar fermerë, institucione, organizata ndërkombëtare dhe partnerë zhvillimorë për të shtyrë përpara një sektor që po shndërrohet në histori të vërtetë suksesi.
