Autoritetet në Hong Kong kanë konfirmuar se numri i viktimave nga zjarri shkatërrues në kompleksin e banesave është rritur në 128, ndërsa bilanci pritet të rëndohet edhe më tej. Lajmin e ka bërë të ditur Sekretari për Sigurinë, Chris Tang, në një konferencë për media të premten pasdite.
Tang paralajmëroi se shifrat mund të rriten, pasi rreth 200 persona ende nuk dihet se ku gjenden dhe nuk është arritur të vendoset kontakt me ta. Ndërkohë, të paktën 79 persona janë raportuar të plagosur nga zjarri, i cili po cilësohet si një prej fatkeqësive më të rënda urbane në historinë e qytetit.
Autoritetet bënë të ditur se kanë pranuar gjithsej 467 kërkesa për persona të zhdukur, ndërsa 39 prej tyre janë konfirmuar se kanë humbur jetën.
Hetimet për shkaqet e zjarrit vazhdojnë, ndërsa ekipet e zjarrfikësve dhe shpëtimit po punojnë në kushte tejet të vështira për të gjetur të mbijetuar.
