Putin vendos kushte për ndalimin e luftës: Rusia kërkon tërheqjen ukrainase nga Donbasi dhe njohjen ligjore të Krimesë
Presidenti rus Vladimir Putin ka deklaruar se Rusia do të ndalojë operacionet ushtarake vetëm nëse forcat ukrainase tërhiqen nga rajoni i Donbasit. Në të kundërt, ai paralajmëroi se Moska do t’i realizojë objektivat e saj me mjete ushtarake.
Në një deklaratë të cituar nga agjencia Interfax, Putin theksoi se njohja ligjore dhe jo vetëm faktike e Krimesë dhe Donbasit mbetet një çështje kyçe për Rusinë. Sipas tij, kjo temë pritet të diskutohet javën e ardhshme me një delegacion të administratës amerikane që do të vizitojë Moskën.
Kreu i Kremlinit komentoi edhe për debatet rreth aseteve të ngrira ruse në Evropë, duke i cilësuar përpjekjet për përdorimin e tyre në favor të Ukrainës si një akt vjedhjeje.
Putin njoftoi se Rusia po finalizon një paketë masash përgjigjeje, e cila do të zbatohet nëse vendet perëndimore vendosin të transferojnë asetet e bllokuara drejt Kievit.
Ky zhvillim vjen në një moment tensioni të lartë mes Rusisë dhe Perëndimit, ndërsa lufta në Ukrainë vijon të sjellë dinamika të reja diplomatike dhe ushtarake.
