Negociatat mes kryetarit të Lidhjes Demokratike të Kosovës, Lumir Abdixhiku, dhe kryetarit të NISMA-s Socialdemokrate, Fatmir Limaj, kanë përfunduar pa ndonjë marrëveshje konkrete për bashkëpunim – të paktën për momentin.
Bllokimi i bisedimeve ka ardhur për shkak të mospajtimit rreth numrit të vendeve që NISMA-s do t’i ofroheshin në listën e kandidatëve të LDK-së për deputetë, si dhe kërkesës që kandidatët e Limajt të bashkoheshin në listën e LDK-së pa siglën e partisë së tyre.
Kryetari i LDK-së, Lumir Abdixhiku, deklaroi të hënën se një pjesë e listës së kandidatëve të partisë mbetet e hapur për bashkëpunime të mundshme, përfshirë edhe me NISMA-n e Limajt.
“LDK do të kujdeset që një pjesë të listës së vet ta hapë për partitë e tjera, përfshirë edhe z. Limaj me deputetët e vet. Për këtë çështje do të diskutojmë ditëve në vijim, por le të themi se kemi gatishmëri,” u shpreh Abdixhiku.
Ai shtoi se partia është e hapur për bashkëpunime të gjera:
“Jemi të hapur edhe për partitë, edhe për individë.”
Për momentin, mbetet e paqartë nëse bisedimet do të rinisin, ndërsa afati për finalizimin e listave zgjedhore po afron.
