Dy persona kanë mbetur të plagosur nga të shtënat me armë zjarri në fshatin Pjetërshan të Gjakovës, të martën, më 10 nëntor 2026. Lidhur me rastin, Policia e Kosovës ka arrestuar një 57-vjeçar, i dyshuar për plagosjen e tyre.
Sipas raportit policor, incidenti ka ndodhur rreth orës 16:30, ndërsa të plagosurit janë dërguar për trajtim mjekësor dhe ndodhen jashtë rrezikut për jetë.
Policia ka konfirmuar se personat e përfshirë në incident kanë lidhje familjare mes tyre, ndërsa motivi i ngjarjes ende nuk është zbardhur.
Gjatë veprimeve hetimore është sekuestruar një armë zjarri që dyshohet se është përdorur në incident, katër gëzhoja dhe një fishek. Gjithashtu, bashkëshortja e të dyshuarit ka dorëzuar në Polici një armë gjuetie që ishte në pronësi të tij.
Pas intervistimit, me vendim të prokurorit, i dyshuari është dërguar në mbajtje.
Rasti po hetohet për veprat penale “Vrasje në tentativë” dhe “Armëmbajtje pa leje”.
