Kuvendi Komunal i Prishtinës mban sot një seancë të jashtëzakonshme, ku në fokus do të jetë diskutimi për mjetet vetanake dhe buxhetin e Komunës për vitin 2026. Mbledhja pritet të nisë në orën 15:00.
Seanca vjen në një moment të ndjeshëm për kryeqytetin, pas disa ditësh bllokimi të transportit publik si rezultat i grevës së punëtorëve të Trafikut Urban dhe operatorëve privatë. Mosmarrëveshjet financiare dhe problemet e akumuluara brenda komunës kanë shkaktuar kolona të gjata dhe vështirësi të mëdha për qytetarët në lëvizjen e tyre të përditshme.
Diskutimet e sotme pritet të jenë vendimtare për stabilizimin e situatës dhe gjetjen e zgjidhjeve afatshkurtra e afatgjata, me synim lehtësimin e qarkullimit urban dhe normalizimin e shërbimeve publike për banorët e Prishtinës.
