Komisioni Qendror i Zgjedhjeve ka mbajtur mbledhjen e 84-të të këtij viti, ku ka miratuar listën e Qendrave të Votimit jashtë vendit për zgjedhjet e parakohshme parlamentare që do të mbahen më 27 dhjetor 2025.
Sipas vendimit, votimi jashtë Kosovës do të organizohet në 50 përfaqësi diplomatike, me gjithsej 66 vendvotime, të shpërndara në 36 shtete të botës. Ky numër mbetet i rishikueshëm, varësisht nga numri i qytetarëve që regjistrohen për të votuar në përfaqësitë diplomatike. KQZ ka caktuar kufirin prej 950 votuesish për çdo vendvotim, ndërsa kapaciteti maksimal i votuesve në këto përfaqësi është 62,700 persona.
Përveç përfaqësive diplomatike, KQZ ka miratuar edhe hapjen e Qendrave të Votimit në hapësira shtesë jashtë Kosovës, bazuar në propozimin e Ministrisë së Punëve të Jashtme dhe Diasporës. Lokacionet shtesë përfshijnë:
Gjermani – 5 Qendra të Votimit
Zvicër – 3 Qendra të Votimit
Mbretëri e Bashkuar – 1 Qendër e Votimit
ShBA – 1 Qendër e Votimit
Këto hapësira do të kenë së bashku 43 vendvotime, me kapacitet të përgjithshëm deri në 40,850 votues.
Në total, për votimin jashtë Kosovës janë miratuar 60 Qendra të Votimit, me gjithësej 109 vendvotime, me kapacitet maksimal prej 103,550 votuesish.
