KAJRO (AP) — Në një deponi mbeturinash në Rripin e Gazës, palestinezë të dëshpëruar po kërkojnë me duar të zhveshura plastika dhe materiale të tjera që mund t’i djegin, vetëm për të përballuar të ftohtin dhe lagështinë e dimrit. Pamjet nga zona Muwasi në Khan Younis përshkruajnë një realitet të rëndë humanitar në enklavën e goditur nga dy vite luftë Izrael–Hamas.
Kjo situatë bie në kontrast të fortë me mesazhet e dhëna nga liderë botërorë në Forumin Ekonomik Botëror në Davos, ku u inaugurua “Board of Peace” i shpallur nga presidenti amerikan Donald Trump, një strukturë që, sipas njoftimeve, do të mbikëqyrë proceset rreth Gazës. Në Davos, Trump pretendoi se në Gaza kanë hyrë “nivele rekord” të ndihmës humanitare që nga fillimi i armëpushimit të ndërmjetësuar nga SHBA, ndërsa Jared Kushner dhe i dërguari Steve Witkoff folën për potencialin e zhvillimit të territorit, pavarësisht shkatërrimit.
Në terren, muaj pas nisjes së armëpushimit, qindra mijëra banorë vazhdojnë të jetojnë në kampe zhvendosjeje, në tenda ose ndërtesa të dëmtuara nga lufta, që nuk i mbrojnë nga temperaturat e ulëta gjatë natës.
Edhe pse armëpushimi është në fuqi, sulme vdekjeprurëse raportohen herë pas here. Sipas drejtorit të Spitalit Shifa, Mohamed Abu Selmiya, granatime nga tanket izraelite të enjten vranë katër palestinezë në lindje të qytetit të Gazës; trupat u dërguan në këtë spital. Ushtria izraelite nuk dha koment të menjëhershëm.
Banorë të Gazës shprehin dyshime se “Board of Peace” do të përkthehet në përmirësim real të jetës së tyre. Rami Ghalban, i zhvendosur nga Khan Younis, tha se e ka të vështirë ta kuptojë si mund të ketë besim në një komitet ku përfshihen edhe izraelitë, duke argumentuar se janë pikërisht ata që, sipas tij, u kanë shkaktuar vuajtje. Të tjerë thonë se nuk shohin alternativë: “Gjendja jonë është e mjerueshme”, u shpreh Fathi Abu Sultan.
Ndërkohë, ndihma në Gaza thuhet se është rritur pas armëpushimit, por banorët raportojnë mungesë karburanti dhe drush, çmime shumë të larta dhe rrezik të vazhdueshëm gjatë kërkimit të materialeve për ngrohje. Zyrtarë spitalorë kanë bërë të ditur se dy djem 13-vjeçarë u qëlluan dhe u vranë të mërkurën teksa tentonin të mblidhnin dru për zjarr.
E pergatitur: /Guxo.info/.
Burimi: Apnews
