28 Nëntori, Dita e Flamurit dhe e Pavarësisë së Shqipërisë, mbetet data më e shenjtë në kalendarin shqiptar.
Në këtë datë të sotme, 70 vjet më parë, lindi Adem Jashari.
Adem Jashari dhe familja e tij u bënë simboli i rezistencës shqiptare, kur në mars të vitit 1998 sfiduan forcat serbe në Prekaz.
Natyrshëm, kjo ditë lidhet me disa ngjarje historike të rëndësishme për shqiptarët.
Për herë të parë, data 28 Nëntor lidhet me ngritjen e flamurit të Skënderbeut në Krujë më 1443, kur ai braktisi ushtrinë osmane dhe u kthye në Atdhe për të nisur rezistencën shqiptare.
Më 28 nëntor 1912, Ismail Qemali ngriti në Vlorë flamurin e kuq me shqiponjë dhe shpalli Pavarësinë e Shqipërisë nga Perandoria Osmane, duke shënuar lindjen e shtetit modern shqiptar.
Fakti që Adem Jashari lindi më 28 nëntor krijon një përputhje të veçantë simbolike mes jetës, veprimtarisë së tij dhe rëndësisë historike të kësaj date. Për shumëkënd, kjo përkoi me mishërimin e vlerave të lirisë, sakrificës dhe identitetit kombëtar që Adem Jashari përfaqëson.
Në vitin 1997, po më 28 nëntor, Ushtria Çlirimtare e Kosovës u shfaq për herë të parë publikisht, ngjarje që konsiderohet si fillimi i epokës së re të luftës për lirinë e Kosovës.
