Të paktën 33 persona janë vrarë dhe shumë të tjerë janë plagosur nga sulmet më të fundit ajrore izraelite në Rripin e Gazës, duke shënuar njërën nga përshkallëzimet më të rënda të dhunës që nga vendosja e armëpushimit të mbështetur nga SHBA muajin e kaluar.
Sulmet në Khan Younis dhe Gaza City
Zyrtarët mjekësorë në spitalin Nasser të Khan Younis konfirmuan se kanë pranuar 17 trupa viktimash, mes tyre pesë gra dhe pesë fëmijë, pasi katër sulme ajrore goditën tendat ku strehoheshin të zhvendosurit palestinezë.
Në Gaza City, zyrtarët shëndetësorë raportuan se dy sulme të tjera vranë 16 persona, përfshirë shtatë fëmijë dhe tre gra.
Reagimet dhe akuzat mes palëve
Ushtria izraelite tha se sulmet u kryen pasi trupat e saj u sulmuan me armë zjarri në Khan Younis të mërkurën, edhe pse nuk u raportuan të plagosur në radhët izraelite.
Hamas e cilësoi ndërhyrjen si një “masakër tronditëse”, duke mohuar se kishte qëlluar drejt forcave izraelite.
Sipas autoriteteve lokale në Gaza, mbi 300 persona janë vrarë nga sulmet izraelite që nga hyrja në fuqi e armëpushimit.
Frika e rikthimit të luftës
Banorët e Gazës thonë se ndihen si në një “luftë që nuk ka përfunduar kurrë”.
Lina Kuraz, 33 vjeç, nga lagjja Tuffah, tregoi se vajza e saj e vogël është e tmerruar nga sulmet:
“Vaji im më pyeti gjithë natën: ‘A do të kthehet lufta?’ Sa herë që përpiqemi të marrim frymë, bombardimet fillojnë përsëri. Kur do të marrë fund ky makth?”
Ndërsa Mohammed Hamdouna, 36 vjeç, i zhvendosur në një tendë në al-Mawasi, tha se situata mbetet dramatike pavarësisht armëpushimit:
“Intensiteti i viktimave është ulur, por sulmet dhe vdekjet ndodhin çdo ditë. Jetojmë ende në tenda, qytetet janë bërë rrënoja, pikat kufitare janë të mbyllura dhe mungojnë gjërat elementare për të mbijetuar.”
